Namangan davlat universitetida eksport xizmatini ko‘rsatuvchi "IT Park" rezidentlari va oliy ta’lim muassasalari o‘rtasida o‘zaro hamkorlikni rivojlantirish, malakali kadrlarni tayyorlash bo‘yicha seminar-trening bo‘lib o‘tdi.

"IT Park"ning logistika boshqaruvi yo‘nalishidagi "Big-I study" IT kompaniyasi menejeri Farruh Ahmadjanov, Sardor Djabbarovlar universitetning Logistika hamda Axborot tizimlari va texnologiyalari yo‘nalishi talabalariga logistika sohasida jahonda mavjud jarayonlar, bu sohada qanday ish topish mumkin, qanday xizmatlar ko‘rsatiladi, logistika biznesidagi muammolarni hal etish kabi ko‘plab bilimlarni ulashishdi. 

Universitet raqamli kompetensiyalar markazi rahbari X.Melibayev ham talabalarga universitetda logistika va IT yo‘nalishlarida ta’lim olishlari uchun keng imkoniyatlar mavjudligi, universitet IT parki aynan IT sohasida taniqli xalqaro tashkilotlar bilan hamkorlik yo‘lga qo‘yilganligini  jumladan Autodesk, JetBrains kabi dasturlar litsenziyalarini talabalar uchun bepul taqdim etish yo‘lga qo‘yilganligini aytib o‘tdi.

Seminar-trening savol-javob qismida talabalar o‘zlarining savollariga mutaxassislardan tegishli javoblarni oldilar.