Mustaqillik darsi: “Yagona Vatan, yagona xalq boʻlib, yangi hayot va kelajak yaratamiz!”

Namangan davlat universitetida 2026/2027-o‘quv yilida 1-bosqichga qabul qilingan talabalar uchun o‘quv jarayoni “Mustaqillik darslari” bilan boshlandi.

Universitetning Fizika-matematika, Tabiiy fanlar hamda Ijtimoiy fanlar fakultetlarida 1-bosqich talabalariga universitet rektori Abdug‘affor Qirg‘izboyev tomonidan “Mustaqillik darslari” o‘tkazildi.

Darslarda mustaqillik yillarida mamlakatimizda ta’lim va ilm-fan sohalarida amalga oshirilgan islohotlar, yoshlarning sifatli ta’lim olishi, bilim va salohiyatini ro‘yobga chiqarishi uchun yaratilayotgan imkoniyatlar haqida so‘z yuritildi.

Rektor bugungi yoshlar oldida turgan muhim vazifalarga ham alohida to‘xtaldi. Talabalar zamonaviy bilim va kasbiy ko‘nikmalarni puxta egallashi, xorijiy tillarni o‘rganishi, ilmiy va ijodiy izlanishlarda faol ishtirok etishi zarurligi ta’kidlandi. Yoshlarning kelgusida mamlakat taraqqiyotiga munosib hissa qo‘sha oladigan yetuk mutaxassislar bo‘lib shakllanishi muhim ekani qayd etildi.

Yangi o‘quv yilining ilk kunlarida tashkil etilgan “Mustaqillik darslari” talabalarga mamlakatimizda amalga oshirilayotgan islohotlar va yaratilayotgan imkoniyatlar haqida yanada kengroq ma’lumot berish, ularda Vatanga muhabbat, milliy g‘urur va daxldorlik tuyg‘ularini mustahkamlashga xizmat qilmoqda.

“Mustaqillik darslari” universitetning qolgan fakultetlarida ham tajribali professor-o‘qituvchilar tomonidan o‘tkazilmoqda.