Namangan davlat universitetining 6 ta ta’lim dasturi ASIIN xalqaro akkreditatsiyasidan muvaffaqiyatli o‘tdi

Namangan davlat universiteti ta’lim sifatini xalqaro standartlar asosida rivojlantirish yo‘lidagi navbatdagi muhim yutuqqa erishdi. Germaniyaning nufuzli ASIIN xalqaro akkreditatsiya agentligi tomonidan universitetning 6 ta ta’lim dasturi muvaffaqiyatli akkreditatsiyadan o‘tkazildi va tegishli xalqaro sertifikatlar universitetga taqdim etildi.

Xalqaro akkreditatsiyadan o‘tgan ta’lim dasturlari quyidagilar:

Kimyo (bakalavriat);
Kimyo (magistratura);
Biologiya (bakalavriat);
Biologiya (magistratura);
Fizika (bakalavriat);
Fizika (magistratura).

ASIIN (Accreditation Agency for Degree Programmes in Engineering, Informatics, Natural Sciences and Mathematics) Germaniyada faoliyat yurituvchi hamda Yevropa oliy ta’lim makonida keng e’tirof etilgan mustaqil akkreditatsiya agentligi hisoblanadi. Agentlik tomonidan beriladigan akkreditatsiya ta’lim dasturlarining xalqaro akademik va kasbiy standartlarga mosligini, o‘quv jarayonining sifati, professor-o‘qituvchilar salohiyati, ilmiy-tadqiqot faoliyati hamda bitiruvchilarning zamonaviy mehnat bozori talablariga javob berishini tasdiqlaydi.

Mazkur natija Namangan davlat universitetida ta’lim sifatini oshirish, xalqaro standartlarni joriy etish, ta’lim dasturlarini modernizatsiya qilish va universitetning xalqaro nufuzini mustahkamlash borasida amalga oshirilayotgan tizimli islohotlarning muhim samarasi hisoblanadi.

Xalqaro akkreditatsiya jarayonida faol ishtirok etgan professor-o‘qituvchilar, fakultetlar jamoalari, tarkibiy bo‘linmalar hamda barcha mas’ul xodimlarning fidokorona mehnati ushbu muvaffaqiyatning asosiy omili bo‘ldi.