Namangan davlat universitetida “Konstitutsiya va yoshlar” mavzusida uchrashuv o‘tkazildi

Uchrashuvda O‘zbekiston Respublikasi Konstitutsiyaviy sudi sudyasi Kozimdjon Kamilov, Namangan viloyat sudi raisi Azamjon Xudoyberdiyev, universitet rektori Abdug‘affor Qirg‘izboyev hamda universitetning Yuridik, Ijtimoiy fanlar, Tabiiy fanlar va Fizika-matematika fakultetlari professor-o‘qituvchilari, talaba-yoshlari ishtirok etdilar.

Uchrashuv avvalida universitet rektori tomonidan mehmonlarga Namangan davlat universitetida amalga oshirilayotgan keng ko‘lamli islohotlar, ta’lim sifatini oshirishga qaratilgan yangiliklar hamda yaratilayotgan zamonaviy shart-sharoitlar haqida batafsil ma’lumot berildi.

Shundan so‘ng, Kozimdjon Kamilov tomonidan mamlakatimizda sud-huquq tizimida amalga oshirilayotgan islohotlar, Konstitutsiyaning jamiyat hayotidagi o‘rni va ahamiyati, fuqarolarning huquq va erkinliklarini ta’minlash borasidagi yangiliklar yuzasidan talaba-yoshlarga atroflicha tushunchalar berildi. 

Uchrashuv davomida talaba-yoshlarning huquqiy bilimlarini mustahkamlash, ularda qonunlarga hurmat ruhini shakllantirish va fuqarolik mas’uliyatini oshirish masalalariga alohida e’tibor qaratildi.

Uchrashuv yakunida talabalar tomonidan sud-huquq tizimiga oid bir qator savollar berilib, mutaxassislar tomonidan ularga batafsil javoblar berildi.